ஆணிகள் அடிக்கப்பட்டு
இறுக்கமாக மூடப்பட்டு
மூலையில் கிடக்கின்றன என் பெட்டிகள்
எத்தனை நாள்கள் இப்படி
நினைவில் இல்லை
பெட்டியின்மேல் புழுதி போர்வையாய்க் கிடக்கிறது
பெட்டிகளுக்கும் சுவருக்கும்
இடைப்பட்ட சந்தில்
எலி குடும்பம் நடத்தும் வாய்ப்பு
நேர்ந்தது என்னால்
வீட்டுக்குள் நுழையும்போதும்
அங்குமிங்கும் நடமாடும்போதும்
கண்ணில்படுகின்றன பெட்டிகள்
பெட்டிகள் குறித்து
ஏதாவது முடிவெடுக்கவேண்டும்
இந்த உறுதியான எண்ணம்
நிறைவேறுவதாய்த் தெரியவில்லை
பெட்டிகளின் இருப்புப் பற்றி
அவ்வப்போது என் கவனத்தில் அறைகின்றன
அம்மா அப்பாவின் சொற்கள்
நாளை பார்க்கலாம் என
சோம்பல் மனது தட்டிக் கழிக்கிறது
பெட்டிகள் இருப்பது
எனக்கு உள்ளேயா வெளியிலா
சில நேரம் குழம்புகிறேன்
உங்களைப் போலவே
நானும் ஆர்வமாய் இருக்கிறேன்
உள்ளே என்ன இருக்கும் என்பதைத்
தெரிந்து கொள்வதில்..
No comments:
Post a Comment